BRUKSEL, 25 shkurt /ATSH-AFP/ – Certifikatat e virgjërisë ‘’të panevojshme për shëndetin’’ dhe ‘’pa rëndësi nga ana shkencore’’ duhet të refuzohen nga profesionistët, njofton Këshilli Kombëtar i Urdhrit të mjekëve belgë në një njoftim të publikuar në web-in e Urdhrit.
Ky njoftim, i cili mban datën 16 shkurt, vjen pas një deklarate të publikuar në tetor 2018 nga Organizata Botërore e Shëndetësisë (OBSH), nënshkruar së bashku me Komisariatin e Lartë të Kombeve të Bashkuara për të Drejtat e Njeriut dhe OKB-Gra, synon dhënien fund të këtyre testeve dhe certifikatave që dëshmojnë virgjërinë e një gruaje përpara martesës, shpesh për arsye që lidhen me besimin fetar.
Në këtë deklaratë, OBSH-ja thekson se kjo praktikë u dokumentua në Afganistan, Brazil, Egjipt, Indi, Indonezi, Iran, Irak, Xhamajkë, Jordani, Libi, Malawi, Marok, Palestinë, Afrikën e Jugut, Sri Lanka, Svaziland, Turqi, Britaninë e Madhe dhe në Zimbabve.
Kërkesa për kryerjen e testeve u bënë gjithashtu në Belgjikë, Kanada, Holandë, Spanjë dhe në Suedi.
Sipas qëndrimit të tij, Këshilli kombëtar belg vlerëson se testet e virgjërisë përbëjnë ‘’një veprim të panevojshëm mjekësor për shëndetin, pa arsye të forta shkencore dhe me pasoja shumë të rënda për mirëqënien emocionale të pacientes”./ /v.b/ a.jor.
