TIRANË, 16 shkurt/ATSH/- Në protestën e sotme të opozitës u shkaktuan një sërë dëmesh kryesisht në godinën e Kryeministrisë dhe në bulevardin “Dëshmorët e Kombit”.
Protesta u shoqërua me akte dhune, kryesisht në drejtim të godinës së Kryeministrisë, ku protestuesit e mbledhur nga opozita tentuan të hyjnë brenda.
Ata dëmtuan dyert dhe thyen xhamat në hyrjen kryesore të godinës së Kryeministrisë, pasi e goditën me skela, tulla e gurë, ndërsa i vunë flakën edhe copave që mbulonin skelën. Gjithashtu, protestuesit duke u ngjitur mbi skelë disa herë, shkatërruan dhe thyen edhe xhamin e dritares në katin e dytë.
Ata shkatërruan edhe instalacionin “Kërpudha”, e vendosur në kopshtin e ndërtesës së qeverisë, që ishte një vepër arti, dhuruar nga autori Carsten Höller.
Aktet e dhunshme dhe veprimet vandale të protestuesve kanë lënë gjurmë në bulevardin “Dëshmorët e Kombit”.
Protestuesit kanë hequr pllakat e trotuareve, ndërsa në rrugë vihen re që nga shishet deri edhe tek shkopinjtë e drurit, çekiçët, fishekzjarret dhe kapsollat e hedhura në drejtim të godinës së Qeverisë.
/k.s/ /a.g/
