TIRANË, 14 shkurt/ATSH/ – Ngritja e memorialit në përkujtim të ish-të përndjekurve dhe të persekutuarve komunistë gjatë 45 viteve diktaturë në Shkodër, po shkon drejt finalizimit.
Bashkia e Shkodrës dhe komisioni “Drejtësi e Paqe” kanë përzgjedhur projektin fitues, i cili sot ka nisur të zbatohet në sheshin para bashkisë së Shkodrës.
Fillimi i punimeve për memorialin, është ndjekur nga afër nga kryetarja e bashkisë së Shkodrës, Voltana Ademi dhe drejtori ekzekutiv i komisionit “Drejtësi e Paqe”, Luigj Mila.
Ademi shprehu besimin se memoriali do të jetë jo thjesht një përkujtimore, por edhe objekt pelegrinazhi, sidomos për turistët, për të njohur të kaluarën e errët në persekucionin komunist.
Ideatorët e memorialit, preferojnë të mos japin detaje për veprën që do të vendoset në sheshin para bashkisë Shkodër.
Mësohet se ai do të jetë 5,5 metra i lartë dhe do të përfshijë në vetvete 8 figura që personifikojnë elementet e persekucionit komunist ndaj Shkodrës. /k.s/ /j.p/
