Ritenderimi i “Unazës së Madhe”, reagon ARRSH

TIRANË, 14 janar /ATSH/ – Autoriteti Rrugor Shqiptar i qëndron plotësisht deklarimeve të bëra sot se kriteret e përcaktuara në “Dokumentet Standarde të Tenderit” për ndërtimin e “Unazës së Madhe” të Tiranës kanë qenë të njëjtat si në tenderin e parë, ashtu edhe në ritenderimin që po zhvillohet aktualisht.

Sipas Autoriteti Rrugor Shqiptar, Partia Demokratike spekulon qëllimisht për ndryshimin e kriterit “NP – 12/G Punime të inxhinierisë së Mjedisit” në “NP -12/F Punime të inxhinierisë së Mjedisit”.

Autoriteti Rrugor Shqiptar sqaron se çdo ndryshim ka ndodhur me kërkesën e Agjencisë së Prokurimit Publik që përpara tenderit të parë, me kërkesën datë 11.09.2018. Ky kriter ashtu sikurse çdo kriter tjetër ka qenë i njëjtë si në tenderimin e parë të datës 17.10.2018 ashtu edhe në ritenderimin e datës 14.01.2019.

ARRSH rithekson se asnjë kriter nuk ka ndryshuar nga tenderi i parë dhe se kjo mund të verifikohet lehtësisht nga çdokush pranë Agjencisë së Prokurimit Publik.

Më në detaje, Autoriteti Rrugor Shqiptar sqaron se: ARRSH në cilësinë e Autoritetit Kontraktor ka shpallur garën për “Rehabilitimi i segmentit rrugor Mbikalimi Pallati me Shigjeta – Rrethrrotullimi Shqiponja, Loti 1” në datën 10.09.2018.

Sipas kësaj shpalljeje, afati për dorëzimin e ofertave ishte 12.10.2018, ora 10:00. Me datë 11.09.2018, Agjencia e Prokurimit Publik ka bërë për Autoritetin Kontraktor rekomandime në lidhje me kriteret e veçanta për procedurën: “Rehabilitimi i segmentit rrugor Mbikalimi Pallati me Shigjeta – Rrethrrotullimi Shqiponja, Loti 1”. Mbi bazën e këtyre rekomandimeve, Autoriteti ka bërë ndryshime në Dokumentet Standarde të Tenderit dhe ka njoftuar Operatorët Ekonomik nëpërmjet sistemit për këto ndryshime. “NP – 12/G Punime të inxhinierisë së Mjedisit” ndryshuar në “NP – 12/F Punime të inxhinierisë së Mjedisit” si dhe “Xhiro mesatare financiare vjetore pa TVSH “ ndryshuar në “Xhiro mesatare financiare vjetore”.

Si rezultat i këtyre ndryshimeve, bazuar në nenin 62 të V.K.M nr.914 dt.29.12.2014 është zgjatur afati për dorëzimin dhe hapjen e ofertave. Afati i dorëzimit dhe hapjes së ofertave ishte 12.10.2018 ora 10:00 dhe u bë 17.10.2018, ora 10:00. Ndryshe nga sa pretendon Partia Demokratike, në garën e parë përpara të cilës janë bërë dhe ndryshimet e kritereve nuk ka marrë pjesë asnjë subjekt i cili rezulton ofertues në ritenderimin aktual. Pra, faktohet se ndryshimi i dy kritereve përpara garës së pare ka pasur si qëllim të rrisë mundësinë për pjesëmarrje sa më të gjerë dhe nuk ka favorizuar asnjë subjekt. Pas anulimit të kontratës për Lot 1, ARRSH ka rishpallur garën me të njëjtat Dokumente Standarde të tenderit, pa ndryshuar asnjë kriter.

Gara e ritenderimit u shpall në 14.12.2018 dhe ofertat u pranuan në datën 14.01.2019, ora 11:00. Ligji i Prokurimit Publik krijon të gjitha hapësirat që operatorët ekonomik të interesuar, në rastet kur nuk janë dakord me kriteret ankohen pranë Komisionit të Prokurimit Publik (KPP). Pavarësisht se hapësira ligjore ka ekzistuar, asnjë operator nuk ka bërë ankesë pranë Komisionit të Prokurimit Publik (KPP).

Partia Demokratike publikoi dokumente me të cilat pretendon se faktohet mashtrimi publik i ARRSH për tenderin e paracaktuar të “Unazës së Madhe”.

/o.l/e.caushi/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.