TIRANË, 13 dhjetor/ATSH-Maela Marini/ “Nuk ka asnjë procedim penal për protestuesit”, – deklaroi sot në mbrëmje Kryeministri Edi Rama nga studio e emisionit “Opinion”.
Kreu i qeverisë hodhi poshtë këtë lajm, që sipas tij u shpërnda në kazanët mediatikë.
“Ju ngritët lajmin se Tupja u procedua penalisht. As Edmond Tupja dhe asnjë protestues nuk është proceduar penalisht. U ngrit e gjitha një shpifje, në një mjedis ku njeriu është i detyruar të përballet me gjithëfarëlloj sajesash dhe gjysëm të vërtetash”, – tha Rama.
Sipas tij, “situatën e ka sqaruar sot Ministri i Brendshëm dhe ky është një raporti rutinë që Policia e Shtetit bën prej vitesh për Presidentin”.
“Ministri i Brendshëm ka kërkuar sot nga Drejtori i Përgjithshëm i Policisë, një hetim pse policia nuk e ka bërë përgënjeshtrimin, pasi nuk ka asnjë procedim penal për protestuesit”, – tha Rama. /r.e/
