TIRANË, 8 tetor/ATSH/ Punimet për rindërtimin e urës mbi kanalin e degës së Martinës në Ferras, Njësia Administrative Levan, Fier, po vijojnë intensivisht për të bërë të mundur përfundimin e saj përpara nisjes së stinës së reshjeve.
E konsideruar si një nga shkaqet e përmbytjeve në Ferras gjatë viteve të fundit, Bashkia e Fierit është përqendruar me të gjitha mjetet për të finalizuar urën e re.
“Java nis me punë dhe mbyllet me të njëjtin intensitet. Edhe pak duhet që të fitojmë një urë tërësisht të re. Sezoni i ri do të ofrojë më shumë siguri për banorët e Ferrasit e jo vetëm”, u shpreh Kryetari i Bashkisë së Fierit, Armando Subashi.
Si pasojë e reshjeve dhe vërshimit të lumit Vjosë, ura mbi kanalin e degës së Martinës duke qenë e ngushtë, pengonte shkarkimin e ujërave, duke ndikuar njëkohësisht në bilancin e përmbytjes së zonës.
Ndërtimi i urës së re bëhet me mbështetjen e ambasadës së Republikës së Çekisë, e cila financoi një shumë rreth 50 mijë euro.
/m.m/j.p/
