TIRANË, 3 tetor/ATSH-Maela Marini/ Si pasojë e leximit të gabuar të vendimit Gjykatës Administrative, dega doganore Morinë, kishte konfiskuar makineritë e prodhimit duke paralizuar veprimtarinë e një biznesi që prodhonte birrë.
Rasti u adresua në platformën e bashkëqeverisjes nga përfaqësuesja e këtij biznesi, e cila gjeti menjëherë zgjidhje.
Shukrie Sadiku, përfaqësuese e një subjekti prodhues të pijeve alkoolike prezantoi sot në takimin e zhvilluar në kryeministri me rastin e 1-vjetorit të funksionimit të platformës së bashkëqeverisjes, rastin e saj.
Ajo u ankua në platformën e bashkëqeverisjes për veprime të padrejta nga ana e Degës Doganore Morinë.
Në vitin 2015 si pasojë e një kontrolli subjekti u gjet me shkelje për të cilat Drejtoria e Doganave duhet të konfiskonte dhe asgjësonte produktin subjekt i akcizës, për prodhimin e të cilës, subjekti në atë kohë nuk kishte autorizimin përkatës.
Por, dega doganore në kundërshtim me vendimin e formës së prerë veç konfiskimit dhe asgjësimit të mallrave, kishte konfiskuar edhe makineritë e prodhimit duke paralizuar veprimtarinë e biznesit, pavarësisht gatishmërisë për përmbushjen e detyrimeve të tij.
Kjo, si pasojë e leximit të gabuar të vendimit Gjykatës Administrative.
Pas ankesës në platformën e bashkëqeverisjes, qytetarja gjeti zgjidhje për biznesin e saj.
