RIJAD, 7 gusht /ATSH-AA / – Kompania ajrore “Saudia” njoftoi se prej 13 gushtit do të pezullojë fluturimet vajtje-kthim në Toronto, sipas shtypit vendas.
Në njoftim theksohet se të gjitha fluturimet e rezervuara për në Toronto janë pezulluar me premtimin se do të gjendet zgjidhje për pasagjerët, të cilët tashmë kanë rezervuar bileta vajtje-kthim në Kanada.
Pezullimi i fluturimeve erdhi pasi Kanadaja bëri thirrje për lirimin e dy aktivistëve të burgosur për të drejtat e grave, përfshirë edhe motrën e shkrimtarit Raif Badawi, i martuar me një kanadeze.
Deklaratat lidhur me arrestimin e aktivistit shkaktuan krizë diplomatike mes dy vendeve.
Arabia Saudite njoftoi dëbimin e ambasadorit kanadez dhe krahas kësaj, të gjitha lidhjet tregtare me Kanadanë janë ndërprerë. /os/
