TIRANE, 26 korrik /ATSH/ -Tragetet e linjave Durrës – Bari dhe Durrës – Ankona e kthim në 5 ditët e fundit kanë transportuar 22.158 udhëtarë me 5.136 automjete gjithsej.
Nga të dhënat operative të Autoritetit Portual Durrës (APD), mësohet se numri i udhëtarëve dhe autoveturave që kanë mbërritur në Durrës me tragete është përkatësisht 3.5 dhe 4 herë herë më i lartë se sa i atyre që kanë shfrytëzuar tragetet për tu nisur drejt porteve të Italisë.
Nga dt 20 – 24 korrik në Terminalin e trageteve janë përpunuar 17.184 udhëtarë dhe 4.108 autovetura në hyrje dhe 4.974 udhëtarë të tjerë me 1.028 autovetura në dalje nga Durrësi drejt Barit dhe Ankonës.
Në muajt korrik dhe gusht rritet së tepërmi numri i udhëtarëve me tragete, kryesisht bashkëatdhetarë që mbërrijnë për të kaluar pushimet pranë familjeve në vendin tonë, Kosovë dhe Maqedoni./e.malaj/j.p/
