TIRANË, 29 qershor/ATSH/ – Një koncert me muzikën amerikane blues, i organizuar me nismën e ambasadorit amerikan në Tiranë, Donald Lu, mblodhi mbrëmjen e sotme në ambientet e Pallatit të Brigadave personalitete të politikës, artit dhe shoqërisë civile.
Koncerti “Red, White & Blues” vjen në vigjilje të 242-vjetorit të Pavarësisë së Shteteve të Bashkuara të Amerikës.
Duke përshëndetur të pranishmit, ambasadori Lu e konsideroi nder “udhëtimin” e bërë gjatë mandatit të tij në Shqipëri.
“Mirë se erdhët në festimin tonë të muzikës amerikane blues. Kjo traditë muzikore është mbi 100-vjeçare dhe nisi me afro-amerikanët. Jemi të nderuar që disa prej muzikantëve më të mirë të Shqipërisë do të interpretojnë sot këngët amerikane. Meqë ky është koncerti im i fundit i Ditës së Pavarësisë me ju, më lejoni të them që ka qenë një nder i madh që kam bërë këtë udhëtim me ju”, – tha Lu.
Mbrëmja kishte si kod veshjeje xhinset dhe festimeve iu bashkuan edhe përfaqësues të trupit diplomatik të akredituar në Tiranë. /m.m//e.caushi/
