TIRANË, 17 qershor/ATSH-Maela Marini/ – “‘Rruga e Arbrit’ është një çështje kombëtare”.
Kështu deklaroi të dielën Kryeministri Edi Rama, gjatë takimit të zhvilluar në Peshkopi, në ceremoninë e nisjes së punimeve të “Rrugës së Arbrit”.
Kryeministri ngre pyetjen se “përse vallë, një copë rrugë, ngre kaq tallaz e kaq pikëpyetje, kur rrugë ndërtohen, kur rrugë me rëndësi nga ana tjetër ende mungojnë në vendin tonë, në pika të forta strategjike për zhvillimin e Shqipërisë?”.
“Sepse është një çështje drejtësie! Drejtësi e historisë, po aq sa drejtësi njerëzore. Drejtësi që shteti shqiptar ka detyrë absolute dhe shtrëngim moral, ta vërë dhe ta garantojë, një herë e përgjithmonë”, – tha Rama.
Dibra, vijoi Kryeministri është një krahinë e rrethuar nga të katër anët me male. “Ajo nuk është, siç kanë pretenduar, ose siç kanë dashur ta kthejnë zuzarët dhe dallkaukët e çdo kohe, në izolim nga pjesa tjetër e Shqipërisë, apo nga viset shqiptare jashtë kufijve të Republikës. Vetë natyra e ka pajisur këtë zonë në 6 pika me gryka të ngushta, që lejojnë komunikimin mes trevave”, – tha Rama.
Kryeministri theksoi se “‘Rruga e re e Arbërit’ do të rigjallërojë këto shtigje me të cilat Zoti bekoi Dibrën, po të cilat ua mbylli robi”.
“Rruga e Arbrit”, – tha Rama, – do të ndjekë vijën e karvaneve që ka lidhur historikisht Dibrën me kryeqytetin”.
“Prej Qafës së Murrës e asaj të Buallit, që lidh me bregdetin, grykës së Setës që të hedh në Shkodër, asaj të Radikës dhe të Drinit që hap Maqedoninë, Dibra gjithkaherë ka pasur vokacionin e një rrjeti komunikimesh mes bashkëkombasve dhe fqinjëve, gjithkaherë fatkeqësisht, të penguar e të vonuar, që nga pushtimet më të hershme e deri tek paudhësitë më të mbrame”, – vijoi Rama. /j.p/
