PRISHTINË, 4 Qershor/ATSH/- Ministri i Financave, Bedri Hamza, priti sot në takim ambasadorin e Republikës Federale të Gjermanisë në Kosovë, Christian Heldt, me të cilin diskutuan për progresin e arritur nga Kosova në fushën e financave.
Gjatë takimit Hamza falënderoi ambasadorin gjerman Christian Heldt dhe shtetin gjerman, si partner strategjik i Kosovës, për ndihmën që vazhdon të japë për Ministrinë e Financave dhe agjencitë e saj.
Po ashtu, Hamza e njohu Heldt me progresin dhe arritjet në Ministrinë e Financave, për trendin pozitiv të të ardhurave gjatë këtij gjashtë mujori, për nivelin e shpenzimeve buxhetore, si dhe për stabilitetin makro fiskal në përgjithësi.
Ministri Hamza gjithashtu njoftoi ambasadorin Heldt, për reformat në legjislacionin tatimor dhe planet e Ministrisë së Financave për reformat në politikat fiskale, në të mirë të të bërit biznes në Kosovë.
Ndërsa, ambasadori i Republikës Federale të Gjermanisë në Kosovë Christian Heldt, shprehu gatishmërinë e shtetit gjerman për vazhdimin e bashkëpunimit dhe ofrimin e ndihmës për Kosovën në realizimin e planeve strategjike në fushën e financave./k.s/
