PRISHTINË, 20 prill/ATSH/.- Kryetari i Kuvendit, Kadri Veseli mori pjesë sot në përurimin e fillimit të punimeve të rrugës Klinë e Epërme – Komoran, ku theksoi se “në Kosovë po ndodhë zhvillimi dhe ndryshimi pozitiv”.
Në fjalën e tij në ceremoninë e përurimit të fillimit të punimeve Veseli theksoi se “për një shekull rresht në këtë rrugë kanë ecuar heronjtë që bënë historinë e Kosovës, ata që punuan e luftuan për lirinë dhe pavarësinë e Kosovës, që nga çetat e Ahmet Delisë e Azem Bejtes, luftëtarët e Shaban Polluzhës, e deri tek njësitet e Ushtrisë Çlirimtare të Kosovës”.
“Sot jemi këtu, në fillimin e punimeve të kësaj rruge për të nderuar kujtimin e tyre. Njëkohësisht, për të dëshmuar forcën tonë për të ecur përpara, forcën tonë për ta zhvilluar Drenicën, për ta zhvilluar Kosovën, për ta fuqizuar shtetin dhe garantuar të ardhmen e sigurtë për fëmijët e Kosovës”, tha Veseli.
Kryeparlamentari u shpreh se “ata që sot dyshojnë se në Kosovë po ndodh ndryshimi pozitiv, janë të njëjtët që dje mendonin se nuk mund të çlirohet Kosova”.
“Ne e çliruam Kosovën. E bëmë shtet të pavarur dhe sovran. Do ta bëjmë shtet të zhvilluar ekonomikisht dhe vend dinjitoz për qytetarët e saj, me rrugë moderne, spitale, shkolla e vende pune për të rinjtë e Kosovës. Nuk ka forcë që mund të na ndalë në këtë mision të shenjtë”, nënvizoi Veseli.
Kryeparlamentari Veseli propozoi që kjo rrugë moderne, nga Klina e Epërme e deri në Komoran, të marrë emrin e heroit kombëtar Shaban Polluzha.
“Shaban Polluzha ishte ai që shtroi për ne rrugën e lirisë. Sot ne e nderojmë këtë burrë të madh të Kosovës duke i vënë emrin e tij kësaj rruge moderne të Kosovës moderne dhe të zhvilluar”, tha Veseli.
/KosovaPress/k.s/
