TIRANË, 26 maj /ATSH – I. Vata/ Teuta është shpallur kampione e Kategorisë Superiore për edicionin 2020-2021 në javën e fundit të kampionatit.
Skuadra durrsake fitoi bindshëm ndaj Apolonisë 6-1 sot në “Niko Dovana”, duke e mbyllur sezonin në vendin e parë me 66 pikë të grumbulluara pas 36 javësh të luajtura.
Golat për durrsakët u shënuan nga Bregu (i cili shënoi tregolësh në minutat 16’, 50’, 65’), L. Vila (27’), Arapi (77’) dhe Plaku (90’+1’), kurse goli i vetëm për fierakët u realizua nga Mihana (34’).
Edhe Vllaznia fitoi 2-0 ndaj Laçit në stadiumin “Loro Boriçi”, por nuk i mjaftoi për të siguruar kreun, ndërkohë që Partizani, një tjetër skuadër që ishte në lojë për titullin fitoi 2-4 në transfertën e Ballshit ndaj Bylisit.
Pas përfundimit të ndeshjes në Durrës është zhvilluar edhe ceremonia e shpalljes së Teutës kampione e Shqipërisë.
Në këtë ceremoni ishin të pranishëm presidenti i FSHF-së, Armand Duka dhe sekretari i përgjithshëm i FSHF-së, Ilir Shulku, të cilët i dorëzuan medaljet dhe trofeun e kampiones skuadrës durrsake, që nisi festën për këtë arritje historike për klubin.
Ky është titulli i dytë kampion në histori për Teutën, teksa të parin e ka fituar në sezonin 1993–94.
Duka: Sot meritojnë të festojnë të gjithë
/j.p/r.e/
