PRISHTINË, 13 Shkurt/ATSH/.- Zëvendëskryeministri i Parë dhe Ministri i Jashtëm i Republikës së Kosovës, Behxhet Pacolli, po merr pjesë dhe do t’i adresohet me një fjalim takimit ministerial të Koalicionit Botëror kundër ISIS-it, i cili po mbahet sot në Kuvajt.
Ky takim, ka për qëllim që të koordinojë përpjekjet e shteteve anëtare në përballjen e tyre me kërcënimet terroriste, jo vetëm në Siri dhe Irak, mirëpo gjithashtu në gjithë botën.
Konferenca do të bashkëdrejtohet nga Zëvendëskryeministri dhe Ministri i Jashtëm i Shtetit të Kuëait-it, Sheikh Sabah Al-Khaled Al-Sabahand dhe Sekretari Amerikan i Shtetit Rex Tillerson.
Në kuadër të këtij takimi, Ministri i Jashtëm Pacolli është takuar me shumë homologë të tij nga vende të ndryshme të botës, duke përfshirë Sekretarin amerikan, Rex Tillerson, Përfaqësuesen e Lartë të Bashkimit Evropian për Politikë të Jashtme dhe Siguri, Federica Mogherini, si dhe Ministrat e Jashtëm të Jordanisë, Libanit, Katarit dhe të tjerë.
Ministrat e Jashtëm dhe zyrtarë të tjerë të lartë shtetërorë të 74 parterëve të Koalicionit Global kundër ISIS-it, që përfshinë shtetet anëtare dhe Organizata Ndërkombëtare, janë takuar në Kuvait, që të riafirmojnë vendosmërinë në këtë qëllim.
Qeveria e Republikës së Kosovës në fund të vitit të kaluar ndau mjete financiare në vlerë prej 100,000 US$ (njëqindmijë dollarë Amerikan) për koalicionin anti-ISIS./k.s/
