KUETO, 4 korrik /ATSH-AFP/ – Ekuadori lëshoi një mandatarresti kundër ish-presidentit, Rafael Correa (2007-2017), i cili jeton në Belgjikë, duke e akuzuar se kishte urdhëruar rrëmbimin e një opozitari politik në vitin 2012.
“Gjyqtarja, Daniella Camacho vendosi për ndalimin e tij në paraburgim dhe njoftoi Interpolin”, shtoi Gjykata Kombëtare e Drejtësisë (CNJ) në Twitter, në kuadër të hetimit për përpjekjen e rrëmbimit të ish-deputetit, Fernando Balda, nga policia e Ekuadorit në Kolumbi.
”Gjyqtarja pranoi kërkesat e Prokurorit të Përgjithshëm, Paul Perez, për pjesëmarrjen e dyshuar të ish-presidentit për përfshirje në një komplot kriminal dhe rrëmbim”, theksoi prokuroria.
Prokurori i Përgjithshëm kishte kërkuar burgosjen e Correas për mosrespektim të një mase parandaluese për paraqitje periodike në Gjykatën e Kuetos.
Prokuroria kishte kërkuar që ish-presidenti të paraqitej çdo 15 ditë në gjykatë duke nisur nga 2 korriku./ /ec/ a.jor.
