BEOGRAD, 20 mars /ATSH-DPA/ – Kryeministrja serbe, Ana Brnabiç njoftoi sot pasdite vdekjen e parë në vendin ballkanik nga COVID-19.
Viktima është një burrë 59 vjeç nga Kikinda, një qytet në veri të vendit dhe një nga pikat e nxehta të koronavirusit në Serbi.
”Ky person ka vuajtur nga sëmundje të shumta kronike”, tha Brnabiç.
”Deri sot kemi 135 pacientë të konfirmuar me koronavirus”, tha Ministria serbe e Shëndetësisë disa minuta më parë.
Serbia shpalli një gjendje të jashtëzakonshme të dielën dhe ndërkohë ka vendosur një bllokim të gjerë, duke mbyllur kufijtë për të gjithë trafikun e pasagjerëve dhe duke urdhëruar një shtetrrethim pothuajse të plotë.
”Kufizimet e reja do të hyjnë në fuqi të dielën, të tilla si ndalimi i plotë i transportit publik dhe mbyllja e kafeneve dhe restoranteve”, tha Brnabiç./ a.jor.
