TIRANË, 24 korrik /ATSH – I. Vata/ “Është koha për ndryshim”, ka deklaruar kryetari i Partisë Demokratike, Lulzim Basha nga Dibra, në takim me strukturat e PD-së.
Basha tha se vetëm 2 vjet e 6 muaj pas masakrës elektorale të 2016 në Dibër dhe asaj të 2017-ës në të gjithë vendin, shqiptarët kanë dhënë mesazhin më të qartë me braktisjen dhe refuzimin total të regjimit me 30 qershor.
“85 përqind refuzim. Është sinjali më i qartë se shqiptarët kanë kryer punë me këtë regjim, se duan ta largojnë një orë e më parë. Është thirrja dhe kushtrimi i shqiptarëve dhe i dibranëve për ndryshim”, tha ai.
Më tej, Basha shtoi se sot kriza ekonomike është problem numër 1 për çdo familje shqiptare, ndaj dhe prioriteti numër 1 për ne demokratët është t’i japim zgjidhje problemeve jetike për çdo shqiptar”.
“Kjo qeveri i është vërsulur buxhetit të shtetit, pasurive të shqiptarëve dhe ka kthyer çdo institucion të shtetit në një instrument vjedhjeje, duke nisur me Parlamentin e duke përfunduar me drejtorinë më të fundit të Shqipërisë”, tha ai, duke shprehu vendosmërinë e tij dhe të opozitës për të shndërruar shumicën e 30 Qershorit në shumicë qeverisëse për vendin.
