TIRANË, 16 janar/ATSH/ Ministria e Mbrojtjes informoi sot lidhur me situatën e krijuar në Bunec, bashkia Himarë ku u dëmtua ujëmbledhësi i hidrocentralit të fshatit Sasaj.
Në një njoftim për shtyp Ministria e Mbrojtjes sqaron se “rreth orës 12:26 të ditës së sotme ujëmbledhësi i Sasajt, në Bunec, bashkia Himarë, i cili është ndërtuar në vitin 2010 ka pësuar shembje. Në momentin e shembjes ka patur rreth 15.000 metra kub ujë. Si pasojë ka prezencë uji dhe balte në 12 biznese në Bunec dhe është dëmtuar baza ushqimore e blegtorisë në 2 familje. Nuk ka probleme në njerëz”.
“Aktualisht është bërë i kalueshëm aksi i rrugës nacionale Bunec-Piqeras dhe po punohet nga strukturat e bashkisë Himarë për pastrimin e baltës. Situata po ndiqet nga prefektura Vlorë dhe strukturat e emergjencave civile të bashkisë Himarë”, thuhet në njoftimin e MM-së.
Në njoftim theksohet se “Ministria e Mbrojtjes, Agjencia Kombëtare e Mbrojtjes Civile dhe Forcat e Armatosura janë përherë në gatishmëri, në ndihmë të komunitetit”.
/k.s/j.p/
