TIRANË, 31 dhjetor /ATSH/ Kryetari i bashkisë së Shkodrës, Benet Beci u shpreh sot se në lagjen Fermentim të këtij qyteti, vazhdon puna për rikonstruksionin e shtatë rrugëve të përfshira në projektin e fituar nga Bashkia Shkodër përmes Ministrisë së Ekonomisë.
Sipas Becit, prej më shumë se 25 vitesh, banorët e kësaj lagjeje kanë pritur këtë investim, që do të ndikojë në përmirësimin e cilësisë së tyre të jetesës dhe përditshmërisë.
Në videon e shpërndarë në rrjetet sociale, përveç mesazheve të banorëve të zonës, Beci thekson se “banorët kanë pritur për 25 vite këtë investim dhe mesazhet e tyre janë dëshmi e një situate emergjente që po ndryshon në dobi të komunitetit të kësaj zone në Shkodër”.
“Kemi mbi 25 vjet që jetojmë në këtë lagje dhe nuk i heqim çizmet nga këmbët, gjatë gjithë vitit. Na mbyti balta dhe lluca. Falënderojmë kryetarin e bashkisë për këtë investim që do na ndryshojë shumë jetesën dhe përditshmërinë”, thonë disa nga banorët e lagjes Fermentim.
/a.f/
