AMSTERDAM, 21 nëntor /ATSH-DPA/- Gjykata Ndërkombëtare Penale (ICC) në Hagë lëshoi një urdhërarrest për kryeministrin izraelit Benjamin Netanyahu, ish-ministrin izraelit të Mbrojtjes Yoav Gallant dhe liderin e Hamasit, Mohammed Deif për krime të dyshuara lufte në lidhje me konfliktin e vazhdueshëm në Rripin e Gazës.
Urdhërarrestet, të miratuara sot nga gjyqtarët në Hagë, pasuan një mocion të paraqitur nga kryeprokurori Karim Khan në maj 2023.
Sipas mocionit, Netanyahu dhe Gallant dyshohen për krime lufte dhe krime kundër njerëzimit në lidhje me aksionet në Gazë që nga 8 tetori.
Khan ka hetuar krimet e dyshuara të luftës gjatë konfliktit të Gazës për disa muaj. Izraeli kishte kundërshtuar urdhrat, por gjyqtarët e ICC-së i hodhën poshtë kundërshtimet.
Udhëheqësi i Hamasit, Deif, është kërkuar për krime lufte dhe krime kundër njerëzimit që nga 7 tetori i vitit të kaluar, pas masakrës së paprecedentë nga Hamasi dhe grupet e tjera në Izraelin jugor.
Ka pasur raporte se Deif u vra në fillim të këtij viti në një sulm ajror izraelit në Gazë. Megjithatë, nuk ka pasur një konfirmim zyrtar për vdekjen e tij.
Izraeli filloi fushatën e tij ushtarake në Gazë për të eliminuar Hamasin pas sulmeve të 7 tetorit.
Deklarata e gjykatës e lëshuar sot tha se Netanyahu dhe Gallant “me dashje dhe me vetëdije e privuan popullsinë civile në Gazë nga objektet e domosdoshme për mbijetesën e tyre”, duke përfshirë ushqimin, ujin dhe ilaçet. //a.i/
