SAN FRANCISKO, 18 tetor /ATSH-DPA/ – Platforma e medias sociale X, e njohur më parë si Twitter, ka filluar të nxjerrë një abonim të ri që do t’i tarifojë përdoruesit e rinj, të paverifikuar me një dollar për veçoritë bazë të platformës.
”Përdoruesit e rinj në Zelandën e Re dhe Filipine do të jenë të parët që do të provojnë programin “Not A Bot”, tha X në një deklaratë.
“Ky program i ri synon të mbrohet kundër ‘bots’ dhe ‘spammers’ që përpiqen të manipulojnë platformën dhe të prishin përvojën e përdoruesve të tjerë X”, theksoi kompania.
“Kjo do të vlerësojë një masë potencialisht të fuqishme për të na ndihmuar të luftojmë ‘bots’ dhe ‘spammers’ në X, duke balancuar aksesin e platformës me shumën e vogël të tarifës”, deklaroi X.
Përdoruesit ekzistues nuk do të preken nga shërbimi i ri i abonimit.
Ata që zgjedhin të mos paguajnë do të jenë në gjendje të ndërmarrin veprime “vetëm për lexim”, përfshirë leximin e postimeve, shikimin e videove dhe ndjekjen e llogarive.
Megjithatë, ata nuk do të ishin në gjendje të pëlqejnë postimet, të përgjigjen, të ripostojnë, të citojnë ose të shënojnë postime./ /os/
