TIRANË, 11 korrik /ATSH/ Interesat e bonove 12-mujore të thesarit shënuan rënie në ankandin e zhvilluar së fundmi.
Sipas të dhënave të Bankës së Shqipërisë, në ankandin e parë të muajit korrik yield-i mesatar i ponderuar i këtyre instrumenteve shënoi nivelin 3.09 %, i njëjtë me ankandin e fundit të muajit qershor.
Yield-et e bonove të thesarit kanë ndjekur një tendencë të vazhdueshme në rënie në gjysmën e parë të vitit 2023. Kjo tendencë i detyrohet rënies së inflacionit, frenimit të rritjes së normave të interesit nga Banka e Shqipërisë dhe likuiditetit të lartë në tregun financiar.
Nga 5 miliardë lekë, që ishte shuma e shpallur për financim nga Ministria e Financave dhe Ekonomisë, shuma totale e kërkesave të paraqitura në ankand arriti në më shumë se 8 miliardë lekë.
Rënia e yield-it të bonove ka një ndikim pozitiv jo vetëm mbi kostot e huamarrjes së qeverisë, por edhe në kreditë afatgjata në lekë të sektorit privat. Kjo po përkthehet në më shumë frymëmarrje për huamarrësit në lekë, pas rritjes së fortë që u shënua sidomos në pjesën e dytë të vitit të kaluar.
/r.e/
