PRISHTINË, 22 gusht /ATSH/ Shoqata “Miqtë e Amerikës” në Kosovë, ka organizuar një festë me rastin e ditëlindjes së 76-të të ish-presidentit të Shteteve të Bashkuara të Amerikës Bill Clinton në objektin e shkollës fillore “Xhavit Ahmeti”, në Prishtinë.
Me këtë rast do të bëhet edhe përurimi i këndit amerikan në këtë shkollë.
Xhavit Berisha, drejtori i shkollës, tha se SHBA ka bashkëpunuar me Kosovën e veçanërisht ish-presidenti Clinton në kohën e luftës.
“SHBA gjithnjë i ka dalë në ndihmë Kosovës, veçanërisht ish-presidenti Bill Clinton në kohën e luftës kur ishim në situatë të vështirë”, tha ai.
Agim Rexhepi, drejtor i Shoqatës “Miqtë e Amerikës”, tha se aleatët tanë meritojnë falënderim për punën dhe angazhimin e vazhdueshëm për Kosovën.
“Aleatët nga jashtë gjithnjë e ndihmojnë Kosovën, dhe kjo ndihmë është e mirëseardhur çdo herë”, tha ai.
