BUDAPEST, 4 maj /ATSH-DPA/- Qeveria hungareze ka shprehur sërish mëdyshjet e saj lidhur me propozimin e fundit të Komisionit Evropian për vendosjen e një embargoje ndaj naftës ruse.
“Ne nuk shohim ndonjë plan apo garanci se si mund të menaxhohet një kalim në burime alternative bazuar në propozimet aktuale”, njoftoi zëdhënësi i qeverisë, Zoltan Kovacs në Twitter.
“Gjithashtu mbetet ende e paqartë se si do të garantohet siguria e energjisë në Hungari sipas sanksioneve të propozuara”, shtoi Kovacs.
Komisioni Evropian prezantoi sot një projekt-paketë sanksionesh, që parashikon ndalimin e importeve të naftës ruse në Bashkimin Evropian deri në fund të vitit.
Propozimi përfshin një përjashtim për Hungarinë dhe Sllovakinë, dy shtete anëtare që janë shumë të varura nga lëndët djegëse fosile ruse, gjë që u lejon atyre të heqin gradualisht importin e naftës në një datë të mëvonshme. //a.i/
