HANOVER, 29 tetor /ATSH-DPA/ – Vandalët dëmtuan dhe në disa raste hoqën me forcë pllakat përkujtimore me emrat e viktimave të Holokaustit nga një mur në Memorialin e Ahlemit në Hanover.
“Një mbishkrim për viktimat politike të regjimit nazist u gris plotësisht nga muri”, sipas një deklarate të lëshuar nga autoritetet lokale.
Policia ka nisur hetimin e krimit të së dielës, për të cilin administrata rajonale beson se ka të ngjarë të jetë motivuar nga ekstremi i djathtë.
”Muri i Emrave” i memorialit përkujton viktimat e nazizmit që u dëbuan dhe u vranë dhe mban emrat e afro 3 000 personave.
Vendi përkujton viktimat e kampit të përqendrimit Ahlem, i cili ndodhej në atë zonë.
Dikur ishte një shkollë hortikulturore hebreje, por më vonë u përdor nga nazistët si një pikë grumbullimi për dëbimet, një burg dhe një vend ekzekutimi./ /os/
