KIEV, 23 gusht /ATSH-DPA/ – Kryeministri indian Narendra Modi mbërriti sot në Kiev për një takim historik me presidentin ukrainas, Volodymyr Zelensky.
Kjo është vizita e parë e një kryeministri indian në Ukrainë që kur vendi u bë i pavarur nga Bashkimi Sovjetik në 1991.
Takimi po vëzhgohet nga afër pasi Zelensky kritikoi ashpër Modin për udhëtimin e tij të profilit të lartë në Moskë gjashtë javë më parë, në të cilin ai zhvilloi bisedime me presidentin rus Vladimir Putin.
Video e Modit dhe Putinit duke u përqafuar habiti Evropën dhe Uashingtonin, veçanërisht pasi erdhi menjëherë pas një sulmi vdekjeprurës rus në një spital pediatrik në Kiev.
Zelensky kritikoi Modin për vizitën e tij në Rusi, duke shkruar në mediat sociale se “është një zhgënjim i madh dhe një goditje e ulët për përpjekjet për paqe të shohësh liderin e demokracisë më të madhe në botë duke përqafuar kriminelin më gjakatar në botë në një ditë të tillë në Moskë”.
India angazhohet diplomatikisht me Ukrainën dhe Rusinë.
Por, qeveria e Modit është kundër sanksioneve perëndimore ndaj Moskës dhe është një blerës kryesor i naftës ruse.
India është gjithashtu shumë e varur nga Rusia për pajisje ushtarake./ /os/
