TIRANË, 21 prill/ATSH/ Policia e Tiranës, në vijim të veprimeve hetimore të kryera në lidhje me aktet e dhunshme gjatë protestës së datës 19 prill, përpara Bashkisë Tiranë, ndaloi sot shtetasin A. M., 53 vjeç, banues në Tiranë.
Në një njoftim për shtyp Drejtoria Vendore e Policisë së Tiranës bëri të ditur se gjatë protestës, 53-vjeçari ka kundërshtuar dhe ka ushtruar dhunë ndaj punonjësve të Policisë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Në protestën e organizuar në 19 prill përpara bashkisë Tiranë, thirrur nga Aleanca për Teatrin, u hodhën në drejtim të portës hyrëse të Bashkisë Tiranë sende të forta dhe lëndë piroteknike artizanale (molotov).
Po ashtu, një grup protestuesish tentuan të çajnë kordonin e Policisë, në portën tjetër të Bashkisë, nga krahu i sheshit “Skënderbej” dhe gjatë këtij momenti ka pasur konfrontim midis protestuesve dhe punonjësve të Policisë.
/m.m/r.e/
