TIRANË, 10 prill/ATSH/ Politikanët shqiptarë uruan sot festën e Fitër Bajramit për të gjithë besimtarët myslimanë.
Zëvendëskryeministrja, njëherësh ministre e Infrastrukturës dhe Energjisë, Belinda Balluku, ishte në një kënd lodrash në Klos, nga ku bashkë me Sarion e vogël uroi të gjithë besimtarët myslimanë për festën e Fitër Bajramit.
“Gëzuar nga ne të dy Bajramin! Qoftë paqja dhe begatia e ulur këmbëkryq në vatrat tuaja. Ne këtu nga Klosi, plot me fëmijë rrethuar kemi kaluar një ditë shumë të bukur. Gëzuar të gjithëve”. tha Balluku.
Ministri i Mbrojtjes, Niko Peleshi uroi agjërim të pranuar të gjithë myslimanëve për sakrificën dhe përkushtimin e treguar në muajin e shenjtë të Ramazanit.
“Me faljen e Namazit këtë mëngjes nga xhamia ‘Iljaz Bej Mirahori’ në Korçë, Gëzuar Fitër Bajramin! Sjellë kjo ditë e bekuar harmoni dhe begati në familjet tuaja”, shkruan Peleshi në mesazhin e tij të urimit.
Ministri për Europën dhe Punët e Jashtme, Igli Hasani uroi sot Bajram të bekuar për të gjithë besimtarët myslimanë. “Agjërim e lutje të pranuar, në mbyllje të muajit të sakrificës e përkushtimit”, uroi Hasani.
Ministri i Drejtësisë, Ulsi Manja uroi gëzuar Fitër Bajramin për të gjithë besimtarët myslimanë. “Me paqe në shpirt dhe Zotin në zemër, ju uroj gëzuar”, shkruan Manja në mesazhin e urimit.
Ministri i Ekonomisë, Kulturës dhe Inovacionit, Blendi Gonxhja u shpreh se “pas një muaji të begatë agjërimi, lutjesh, sakrificash, reflektimi, Fitër Bajrami vjen si një shpërblim i gjithë përkushtimit dhe dedikimit përgjatë muajit të Ramazanit. “Gëzuar Fitër Bajramin të gjithë besimtarëve myslimanë”, uroi Gonxhja.
Ministrja e Bujqësisë dhe Zhvillimit Rural, Anila Denaj u shpreh se Bajrami i Madh, si një festival humanizmi, na rikujton se sa pasuri e pamasë është dhimbsuria e Zotit, liria e besimit, dashuria për familjen e për njerëzit, shërbimi për të dobëtit.
Edhe kryetari i Partisë së Lirisë, Ilir Meta uroi lutje të pranuara dhe mirësi dhe begati në çdo familje shqiptare.
/r.e/
