KIEV, 27 janar /ATSH-DPA/ – Ushtria ruse ka shtuar përpjekjet e saj për të marrë kontrollin e qyteteve dhe fshatrave të Ukrainës ditët e fundit, sipas ushtrisë ukrainase.
“Forcat pushtuese kanë rritur ndjeshëm numrin e sulmeve për të dytën ditë radhazi, armiku ka kryer 50 operacione luftarake”, tha sot gjeneral brigade Oleksandr Tarnavskyi në Telegram.
Tarnavskyi, i cili është përgjegjës për pjesën jugore dhe juglindore të Ukrainës, tha se numri i sulmeve ajrore është rritur gjithashtu.
Shifrat e cituara nga Tarnavskyi me sa duket i referohen pjesës jugore të rajonit të Donetskut.
Ai përmendi në mënyrë eksplicite sulmet kundër qyteteve Myrnohrad dhe Novohrodiivka, të cilat ndodhen afër frontit dhe që u goditën me raketa të konvertuara të mbrojtjes ajrore një ditë më parë.
Moska nisi një ofensivë të re në këtë zonë në vjeshtën e vitit 2023 për të pushtuar qytetin Avdivka, që kufizohet drejtpërdrejt me qytetin e madh të Donetskut dhe kontrollohet nga forcat ruse që nga viti 2014. //a.i/
