TIRANË, 25 janar/ATSH/ Guri i Kamjes në Pogradec është ndër monumentet natyrore më të frekuentuara në zonë nga turistë vendas dhe të huaj. Ndërsa dimri ka shtruar ngjyrat e veta në peizazhet e mrekullueshme që ofron ky shteg, kanë ndryshuar edhe vizitorët që e preferojnë. Tashmë adhuruesit e dëborës dhe maleve janë ata që përshkojnë shtegun.
Në momumentin natyror mund të arrihet duke ndjekur shtegun “Dardhas-Guri i Kamjes”, me një gjatësi prej rreth 3.5 km dhe nivel mesatar vështirësie. Agjencia Kombëtare e Zonave të Mbrojtura sugjeroi disa pamje nga zona në këtë periudhë që ftojnë gjithkënd të bëhet pjesë e eksperiencës.
“Edhe pse bora ka veshur të gjithë zonën, shtegu mund të përshkohet duke ndjekur sugjerimet e specialistëve dhe duke patur përgatitjen e duhur fizike”, shkruan AKZM në rrjetet sociale.
