TIRANË, 6 dhjetor/ATSH-Maela Marini/ Kryeministri Edi Rama bëri të ditur sot se së shpejti do të dërgohen në parlament një sërë ndryshimesh në ligjin për Prokurimet Publike.
I ftuar në një studio televizive, Rama tha se “kemi adresuar sistemet dhe kemi bërë progres, por ka shumë për të bërë akoma për ta shkëputur individin nga monopoli i vendimmarrjes në çdo nivel dhe për t’i dhënë sa më shumë fuqi mekanizmave të shtetit që të jenë mbi vullnetin e individëve.
“Do çojmë në parlament një sërë ndryshimesh në ligjin e prokurimeve publike. Kemi filluar të ndërtojmë një model komplet tjetër me Prokurimet Publike që kanë të bëjnë me blerje të përqendruara. Në Shqipëri çdo institucion bën prokurime dhe procedurat e tenderëve kërkojnë ekspertë dhe njerëz të ditur. Ndaj një pjesë e konsiderueshme e anëtarëve të komisioneve janë viktimë e padijes në radhë të parë, jo e faktit se janë të përfshirë”, tha Rama.
Ky problem, sipas tij, adresohet me modernizimin e sistemeve.
“Do të marrim agjenci ndërkombëtare për procese prokurimesh dhe do të përdorim inteligjencën artificiale. Uroj dhe besoj që brenda këtij mandati ne të heqim komplet njerëzit nga bërja e tenderëve. Është një punë shkencor në bashkëpunim me Microsoft”, tha Rama.
