TIRANË, 2 qershor /ATSH/ Banka e Shqipërisë bën të ditur se, për katër muajt e parë të vitit 2023 kredia e re për konsum e dhënë nga sektori bankar, duke përfshirë edhe overdraftet, kishte vlerën e 10.6 miliardë lekëve, shifër kjo pothuajse e njëjtë me një vit më parë.
Vlera totale e portofolit të kredisë konsumatore në fund të muajit prill kishte vlerën e 70.4 miliardë lekëve, me një rritje vjetore prej 6.9 %, nga 7.5 % që kishte qenë rritja vjetore në fund të vitit 2022.
Sipas BSH-së, në segmentin kryesor të kredisë për individë, atë që financon blerjen e banesave, rritja po vazhdon edhe në pjesën e parë të këtij viti.
Shifrat tregojnë se për katër muajt e parë të vitit, sektori bankar disbursoi gjithsej 15.4 miliardë lekë kredi të reja për blerje banesash.
Krahasuar me të njëjtën periudhë të një viti më parë, ky tregues u rrit me 7.2 %.
/gj.m/r.e/
