BERLIN, 6 maj /ATSH-DPA/ – Kancelari gjerman, Olaf Scholz shprehu sot urimet për kurorëzimin e mbretit të Britanisë së Madhe Charles III sot në Westminster Abbey, në Londër.
“Mbreti Charles III është i përkushtuar për bashkëpunim të ngushtë midis Britanisë së Madhe dhe Bashkimit Evropian dhe gjithashtu avancimin e mbrojtjes së klimës”, tha Scholz.
“Kjo do të na ndihmojë, gjithashtu”, shtoi ai.
Charles u bë mbret i Britanisë së Madhe pas vdekjes së nënës së tij, Elizabeth II, më 8 shtator 2022.
Ceremonia zyrtare e kurorëzimit po zhvillohet sot në Angli, ku merr pjesë edhe presidenti gjerman Frank-Walter Steinmeier, që përfaqëson Berlinin.
Presidentja e Komisionit Evropian Ursula von der Leyen gjithashtu uroi çiftin mbretëror të sapokurorëzuar britanik.
“Kurorëzimi është një dëshmi e forcës së qëndrueshme të monarkisë britanike. Një simbol i stabilitetit dhe vazhdimësisë,” shkroi Von der Leyen në Twitter.
“Urimet e mia për mbretin Charles III dhe mbretëreshën Camilla”, shtoi ajo.
Ajo ishte në mesin e politikanëve të shumtë të ftuar për të marrë pjesë në ceremoninë e kurorëzimit.
Në ceremoni janë pritur përfaqësues nga 203 vende, duke përfshirë rreth 100 krerë shtetesh.//a.i/
