TIRANË, 8 dhjetor /ATSH/ Kryetarja e Kuvendit, Lindita Nikolla dha sot një mesazh me rastin e Ditës Kombëtare të Rinisë.
“Me rastin e Ditës Kombëtare të Rinisë, përshëndes vajzat dhe djemtë e Shqipërisë, nxënësit, studentët, punëtorët dhe specialistët e rinj. 8 Dhjetori nuk është thjesht një ditë sensibilizimi, por reflektimi e inspirimi: është dita e rilindjes së ëndrrës evropiane të rinisë dhe gjithë shqiptarëve”, u shpreh Nikolla.
“Inkurajoj rininë të përfshihet më shumë në jetën shoqërore e politike, si qytetarë të angazhuar”, theksoi kryetarja e Kuvendit.
“Të bëhet promotore e teknologjive të reja në “kontinentin digjital”, pa u shkëputur nga komunikimi njerëzor dhe kontributi në shoqëri. Të bëhet nxitëse e ndërtuese e solidaritetit mes brezave”, shkroi Kryetarja e Kuvendit, Lindita Nikolla.
/r.e/
