TIRANË, 25 nëntor/ATSH – I. Vata/ Shefi i Organizimit në Partinë Demokratike, Klevis Balliu ka reaguar për arrestimin e ish-kryetarit të Komunës Farkull, Viktor Çervanaku pas zbulimit të laboratorit të kokainës në Fier.
Në një deklaratë për mediet, Balliu deklaroi se “Çervanaku është shëmbëlltyrë e pushtetit dhe tregon qartë lidhjet e qeverisë me krimin”.
“Viktor Çervanaku, që u kap si mi nga amerikanët, nuk është thjesht një zyrtar socialist i korruptuar, ai është shëmbëlltyra ideale e pushtetit të Edi Ramës”, tha ai.
Balliu u shpreh se Partia Demokratike dënon lidhjet mes trafikantëve që shkojnë deri në majat e pushtetit.
Në vijim të deklaratës, Balliu shprehet se raportimet dëshmojnë se droga transportohej me kamionët e ushtrisë drejt Malit te Zi, çka vërteton implikimin direkt të politikës në narkotrafik. /j.p/
