TIRANË, 20 korrik/ATSH/ Dita Ndërkombëtare e Shahut festohet çdo vit më 20 korrik, në ditën kur u themelua Federata Ndërkombëtare e Shahut (FIDE), në vitin 1924.
Me këtë rast, edhe bashkia e Tiranës ka organizuar një event, një simultane shahu, pranë qendrës sociale “Të qëndrojmë së bashku”.
Në simultanen e cila nisi që herët në mëngjes, kanë marrë pjesë shahistë të moshave të ndryshme, ashtu siç dëshmon edhe motoja e këtij eventi: “Shahu nuk ka moshë dhe gjini”.
Shpirti i garës u vu re tek të gjitha moshat pjesëmarrëse në këtë aktivitet, të organizuar nga Drejtoria e Sportit, Drejtoria e Integrimit Evropian dhe Projekteve të Huaja si dhe nga Drejtoria e Përgjithshme e Shërbimit Social pranë bashkisë Tiranë.
Ideja për të festuar këtë ditë si dita ndërkombëtare të shahut u propozua nga UNESCO dhe është festuar si e tillë që nga viti 1966, pasi u themelua nga FIDE.
/r.e/
