TIRANË, 16 korrik/ATSH/ Në Elbasan u përurua Qendra e Shërbimit të Ndihmës Juridike Parësore, e cila i bashkohet sistemit të ndihmës juridike falas në Republikën e Shqipërisë.
Në ceremoni ishte e pranishme zv/Ministrja e Drejtësisë, Adea Pirdeni, kryetarja e Gjykatës së Rrethit Gjyqësor Elbasan, Matilda Fetau, ambasadori i Austrisë në Shqipëri, Christian Steiner, përfaqësuesja e përhershme e UNDP për Shqipërinë, Monica Merino, Drejtori i Përgjithshëm i Drejtorisë së Ndihmës Juridike Falas, Ergys Qirici, etj.
Hapja e kësaj qendre, siç e theksuan edhe folësit, ofron mundësinë e aksesit në drejtësi për të gjitha shtresat vulnerabël në qarkun e Elbasanit.
Një ndër objektivat e Ministrisë së Drejtësisë dhe risi e sjellë drejtpërdrejtë nga Reforma në Drejtësi është ofrimi i ndihmës juridike falas.
Ligji për “Ndihmën juridike të garantuar nga shteti” mundëson ofrimin e ndihmës juridike të garantuar nga shteti, falas, për ata qytetarë që janë në pamundësi financiare për të marrë një avokat apo për këshillim ligjor.
/m.m/
