TIRANË, 1 korrik/ATSH/ Grupi “The Kroks” i Universitetit të Harvardit, interpretoi mbrëmë tek Reja, duke e argëtuar publikun me versionet e tyre “a capella” të këngëve të njohura klasike amerikane. Kori i studentëve i argëtoi të pranishmit me humorin dhe lëvizjet e tyre të kërcimit.
Zëvendësshefja e Marrëdhënieve me Publikun, në Ambasadën e Shteteve të Bashkuara, Amanda Roberson dhe nënkryetarja e bashkisë së Tiranës, Keti Luarasi përshëndetën publikun dhe falënderuan grupin “Kroks” për vizitën e tyre të parë, në Shqipëri, në nder të 100-vjetorit të marrëdhënieve SHBA-Shqipëri.
Ambasada e Shteteve të Bashkuara shprehet se grupi i djemve të Universitetit të Harvardit, po e shijon vizitën në Shqipëri.
Më herët ata kanë vizituar Universitetin e Arteve ku takuan korin e talentuar të studentëve. Grupet u argëtuan duke interpretuar për njëri-tjetrin dhe duke biseduar mbi përvojat e tyre si studentë-artistë, të cilët udhëtojnë nëpër botë.
Gjithashtu “Kroks” vizitoi një kamp veror i cili është pjesë i programit Access, një program bursash të vogla për gjuhën angleze për nxënësit e moshës nga 13 deri 15 vjeç.
Ata dhanë një koncert për grupin dhe mësuan mbi synimet dhe projektet e ardhshme të nxënësve, për të cilat ata po punojnë në kampin veror.
/r.e/
