TIRANË, 19 prill/ATSH/ Kryetari i grupit parlamentar të Partisë Demokratike, Enkelejd Alibeaj deklaroi sot se “procesi i zgjedhjes së presidentit duhet të jetë gjithëpërfshirës dhe transparent që të japë produktin e duhur”.
“Presidenti, siç edhe Kushtetuta e thotë, është kryetar i shtetit dhe mbi të gjitha përfaqëson unitetin e popullit. Ky është edhe frymëzimi nga i cili do të duhet të niset procesi”, tha Alibeaj në një prononcim për mediet.
Sipas tij, “është e rëndësishme që procesi të jetë gjithëpërfshirës, transparent, jo i mbyllur në zarf”.
“Procesi duhet të jetë transparent, gjithëpërfshirës, në sytë e shqiptarëve. Të gjithë e dimë se në raundin e 4 dhe 5, presidenti zgjidhet me votat e mazhorancës. Kjo nuk duhet përdorur si një mjet për ta futur në zarf dhe pjesa tjetër të zgjedhë zarfin”, tha ai.
Alibeaj shtoi se grupi parlamentar i PD-së do të mbajë qëndrimin e vet mbi gjithçka, mbi procesin, mbi produktin, mbi kriteret dhe gjithçka tjetër që ka lidhje me presidentin e Republikës.
“Nuk është president i deputetëve, por është i shqiptarëve. Kjo duhet të prevalojë mbi gjithçka”, tha ai.
/m.m/r.e/
