VARSHAVË, 7 prill /ATSH-DPA/ Rreth 2.55 milionë refugjatë ukrainas janë strehuar në Poloni që nga fillimi i pushtimit rus më 24 shkurt.
“Vetëm dje u regjistruan 23,400 persona, një rritje prej 16% krahasuar me një ditë më pare”, njoftoi sot roja kufitare polake në Twitter.
Gjatë një takimi në Varshavë, kryeministri polak Mateusz Morawiecki falënderoi përfaqësuesit e qeverive lokale për bashkëpunimin e tyre në trajtimin e refugjatëve nga Ukraina.
“Kemi të bëjmë me krizën më të madhe të refugjatëve që nga Lufta e Dytë Botërore”, tha ai, sipas agjencisë së lajmeve PAP.
“Polonia dëshiron t’u ofrojë refugjatëve ukrainas një pjesë të normalitetit. Prandaj, bashkëpunimi i qetë ndërmjet qeverisë dhe komunave është jashtëzakonisht i rëndësishëm”, shtoi ai.
Sipas Morawiecki, qeveria ka siguruar 500 milionë zloti (120.1 milionë dollarë) për të ndihmuar komunat të pranojnë refugjatët.
Aktualisht nuk ka asnjë informacion zyrtar sesa është numri i refugjatëve të luftës që kanë qëndruar në Poloni dhe sa kanë udhëtuar në vendet e tjera të BE-së.
“Gatishmëria për të ndihmuar ofron gjithashtu një mundësi unike për të përcjellë një imazh pozitiv të Polonisë në mbarë botën”, tha Morawiecki. //a.i/
