TIRANË, 12 mars/ATSH/ Policia e Shtetit ka ndalur disa persona, të cilët gjatë protestës së djeshme në disa qytete të vendit kundër rritjes së çmimeve, janë konfrontuar me punonjësit e Policisë dhe kanë bllokuar lëvizjen e lirë të automjeteve dhe të qytetarëve.
Në kryeqytet policia procedoi penalisht 6 shtetas që penguan qarkullimin e mjeteve të transportit, dhe prishën rendin dhe qetësinë publike gjatë protestës së ditës së djeshme.
Drejtoria Vendore e Policisë Dibër ka arrestuar në flagrancë 5 shtetas të cilët penguan qarkullimin e automjeteve duke bllokuar rrugën nacionale Bulqizë-Peshkopi dhe nuk iu bindën e kundërshtuan me forcë punonjësit e Policisë. Po ashtu Policia e Dibrës procedoi penalisht 16 shtetas dhe shpalli në kërkim një tjetër.
Në Lezhë, Polica arrestoi në flagrancë 1 shtetas dhe procedoi penalisht 10 të tjerë, pasi bllokuan rrugën duke mos lejuar kalimin e automjeteve në të dy senset e lëvizjes në rrugën Lezhë-Shkodër.
Policia e Korçës procedoi penalisht 10 shtetas që penguan qarkullimin e automjeteve gjatë protestës së ditës së djeshme dhe kundërshtuan e nuk iu bindën urdhrit të punonjësve të policisë për të zhbllokuar rrugën.
Në Berat, Policia procedoi penalisht 5 shtetas që penguan qarkullimin e automjeteve duke bllokuar rrugën kryesore urbane “Antipatrea” dhe nuk iu bindën urdhrit të punonjësve të Policisë.
Në Lushnjë, u proceduan penalisht 13 shtetas që bllokuan rrugën duke mos lejuar kalimin e automjeteve në të dy senset e lëvizjes në aksin rrugor Fier-Lushnjë./m.m/
