TIRANË, 4 mars /ATSH/ Në kuadër të luftës kundër informalitetit në tregun e punës Inspektorati Shtetëror i Punës dhe Shërbimeve Shoqërore ka nisur fushatën e ndërgjegjësimit nën sloganin “Së bashku arrijmë më shumë”.
Ministria e Financave dhe Ekonomisë bën të ditur se, kjo fushatë do të shtrihet në aktivitetet fason dhe do të zhvillohet e integruar paralelisht në dy forma që përfshijnë ndërgjegjësim për punëdhënësit dhe ndërgjegjësim për punëmarrësit.
Ndërgjegjësimi i punëdhënësve do të përmbushet përmes organizimit të tryezave rajonale, të cilat do të udhëhiqen nga drejtues të lartë të ISHPSHSH-së.
Sipas MFE-së, diskutimet do të jenë të lidhura me rëndësinë e sektorit në tregun e punës, zbatimit të legjislacionit për të garantuar kushtet dhe standardet në punë, sfidat dhe iniciativat e përbashkëta në kuadër të zhvillimit ekonomik dhe luftës kundër informalitetit.
MFE njofton se faza e parë në kuadër të kësaj nisme, do të zhvillohet me punëmarrës të fasonerive dhe konkretisht takimi u organizua në drejtorinë rajonale Korçë, ku gjatë bashkëbisedimit me punonjës dhe drejtues të fasonerisë Korçë u prezantuan dhe shpërndanë informacione nëpërmjet fletëpalosjeve për të drejtat dhe detyrimet që rrjedhin nga legjislacioni i punës.
/j.p/r.e/
