TIRANË, 2 mars /ATSH/ Banka e Shqipërisë bëri të ditur se, bonot e thesarit me afat 12- mujor u shitën me norma interesi (yield-i) 1.62 %.
Sipas BSH-së, norma e interesit u rrit me 0.04 % krahasuar me ankandin e javës së kaluar, ku yield-i mesatar për këto bono shënoi nivelin 1.58 %.
Gjithsesi, aktorët e tregut vlerësojnë se, tregu financiar vendas mbetet likuid dhe gatishmëria e investitorëve për të financuar borxhin qeveritar është i lartë.
Nga 9.2 miliardë lekë që ishte shuma e shpallur për financim nga Ministria e Financave, në ankand u paraqitën kërkesa totale për një vlerë prej 11 miliardë lekësh.
Një tendencë e ngjashme u shënua edhe në ankandin e bonove me maturim 6-mujor. Yield-i mesatar i ponderuar u rrit lehtë në 1.24 %, nga 1.21 % që kishte qenë në ankandin e mëparshëm. Qeveria shqiptare financoi një shumë prej 1 miliard lekësh, ndërsa shuma e kërkesave në ankand arriti në 1.22 miliardë lekë.
/j.p/r.e/
