TIRANË, 30 dhjetor/ATSH/ Tirana, kryeqyteti i Shqipërisë, e dekoruar nga dritat shumëngjyrëshe po pret ndërrimin e viteve.
Qyteti i veshur me dritat vezulluese, ka tërhequr këto ditë festash vëmendjen e qytetarëve, por edhe të vizitorëve vendas dhe të huaj.
Sheshi “Skënderbej” vitet e fundit është kthyer në epiqendrën e festimeve. Gjatë gjithë ditës, por edhe në mbrëmje, shtëpizat dhe lodrat e ndryshme të vendosura në shesh janë frekuentuar nga të gjitha moshat, por natyrisht më të lumturit e kësaj feste janë fëmijët.
Vitin e kaluar për shkak të pandemisë kryeqytetasit e shijuan spektaklin e fishekzjarreve nga ballkonet, ndërsa këtë vit Komiteti Teknik i Ekspertëve vendosi heqjen e orës policore natën e ndërrimit të viteve.
Fotografët e ATSH-së memorizuan në foto momente nga atmosfera e këtij ndërrimiviti në kryeqytet.
/k.s/j.p/
