VARSHAVË, 21 dhjetor /ATSH-PAP/ Rezultatet e një sondazhi të ri të CBOS të publikuar të hënën kanë treguar se 58 për qind e polakëve nuk duan që migrantët nga ana e kufirit të Bjellorusisë të kenë mundësi për të aplikuar për azil në Poloni.
Sipas anketimit, një e treta e të anketuarve (33 përqind) thanë se migrantët duhet të kenë mundësinë të aplikojnë për azil në vend.
Krahasuar me një sondazh të mëparshëm në shtator, një numër më i vogël personash nuk kishin një opinion specifik për këtë çështje (një rënie prej 6 pikë përqindjeje), raportoi CBOS.
“Ekziston ende një hezitim për t’i lejuar migrantët… qasje në procedurën e azilit”, tha CBOS.
Anketuesi deklaroi gjithashtu se 66 përqind e të anketuarve ishin në favor të ndërtimit të barrierave në kufirin polako-bjellorus për të frenuar përpjekjet për hyrje të paligjshme në Poloni, ndërsa 26 përqind ishin kundër kësaj ideje.
Për më tepër, 54 për qind e të anketuarve mbështetën hapat e ndërmarrë nga qeveria polake në krizën kufitare dhe 34 për qind kritikuan ndërmarrjet e saj.
CBOS kreu anketën në 29 nëntor-12 dhjetor me pjesëmarrjen e 1,063 polakëve. //a.i/
