TIRANË, 19 dhjetor /ATSH/ Pranë Ministrisë së Bujqësisë dhe Zhvillimit Rural do të krijohet dhe funksionojë Këshilli Kombëtar i Vitivinikulturës, që ka për qëllim të përcaktojë vendosjen e rregullave për kultivimin e vreshtave që përdoren për prodhimin e verës, regjistrin e vreshtarisë, prodhimin, etiketimin dhe kontrollet e produkteve të verës në vendin tonë, me kërkesat e standardet e tregut ndërkombëtar.
Projektligji i ri që ka kaluar për diskutim në komisionet e Kuvendit, parashikon krijimin e këtij komisioni dhe ka si qëllim mbrojtjen e interesave të konsumatorëve, duke ruajtur një konkurrencë të drejtë ndërmjet prodhuesve dhe operatorëve të tjerë në sektorin e verës.
Këshilli Kombëtar i Vitivinikulturës miratohet dhe drejtohet nga ministri dhe ka në përbërje 11 anëtarë.
Po ashtu parashikohet të krijohet edhe Komisioni i Verës që do të ketë në përbërje 7 anëtarë që kanë eksperiencë në këtë fushë të paktën 15-vjet .
Shqipëria, si vend mesdhetar, i ka të gjitha kushtet klimatiko-tokësore për kultivimin e vreshtave.
Vitet e fundit prodhimi i rrushit në Shqipëri është rritur ndjeshëm, nga 79 000 ton në vitin 2019, në 205 000 tonë në vitin 2020. Shtimi i sipërfaqeve dhe e prodhimit të vreshtave janë të lidhura ngushtë me aplikimin e skemave të subvencionimit.
Varietetet autoktone dhe ato të huaja që kultivohen gjerësisht në Shqipëri janë Kallmet, Sheshi i zi, Sheshi i Bardhë, Vlosh, etj. Kurse varietetet kryesore të importuara janë Merlot, Cabernet Sauvignon, Chardonnay, Riesling, Petit Verdon.
Synimi i politikave në lidhje me vreshtarinë dhe verën është zëvendësimi i importeve dhe kapja e tregut të turizmit.
