TIRANË, 5 dhjetor /ATSH/ Zv/ministrja e Shëndetësisë dhe Mbrojtjes Sociale, Eugena Tomini tha se, “në Shqipëri, nuk kemi asnjë rast të dyshuar apo të konfirmuar për Omicron”.
Në një prononcim për mediet Tomini shpjegoi se, “Instituti i Shëndetit Publik, (ISHP) në bazë të mostrave të testuara me anë të PCR, për çdo mostër të dyshuar e bën gati në pako dhe dërgon mostra sistematikisht”.
Për sa i përket pandemisë, Tomini thotë se tashmë prej më shumë se 4 javësh Shqipëria paraqet një situatë të qëndrueshme të Covid.
“Për më shumë se 4 javët e fundit kemi një situatë të qëndrueshme pavarësisht luhatjeve ditore të rasteve pozitive”, tha ajo, ndërsa vuri në dukje se , “kjo është një situatë e kontrolluar qoftë në drejtim të rasteve pozitive por edhe atyre që kërkojnë trajtim spitalor”.
Ekspertët rekomandojnë vaksinimin e plotë me dy doza si dhe rritjen e mbulesës vaksinale në popullatë, për të patur situatë të qëndrueshme në një kohë kur në vend po qarkullojnë virusi i gripit dhe Covid. /a.a/
