TIRANË, 2 nëntor/ATSH/ Kryetarja e Lëvizjes Socialiste për Integrim, Monika Kryemadhi u shpreh sot se, “Instituti Demokratik Amerikan (NDI) është një partner i vyer i LSI-së dhe Shqipërisë, për ndërtimin dhe rritjen e demokracisë në vend”.
Kryemadhi zhvilloi sot takim me presidentin e NDI, Derek Mitchell dhe drejtorin rajonal Robert Benjamin.
“Gjatë takimit të sotëm vlerësova mbështetjen e pakursyer të ofruar ndër vite dhe bashkëndamë mendimin për nevojën e pavarësimit dhe fuqizimit të parlamentit, si institucioni bazë që garanton një demokraci funksionale që i shërben të gjithë qytetarëve”, tha Kryemadhi në një reagim.
“Duke i shprehur nevojën për një aktivitet të shtuar të NDI në Shqipëri, me theks tek mbështetja e të rinjve dhe grave në politikbërje, i nënvizova qëndrimin tonë, se integrimi i Shqipërisë në familjen evropiane, duhet shpëtuar nga pengmarrja e interesave private të politikanëve, dhe LSI do të vijojë e angazhuar, si një opozitë konstruktive për të çuar përpara reformat dhe aksionet e nevojshme që e realizojnë këtë mision sa më parë”, theksoi Kryemadhi.
/j.p/r.e/
