100 të rinj angazhohen për startup-et në bujqësi

TIRANË, 25 tetor /ATSH/ Digjitalizimi i bujqësisë është një ndër faktorët më të rëndësishëm për zhvillimin e mëtejshëm dhe inovacionin në këtë sektor.
Ministria e Bujqësisë dhe Zhvillimit Rural në bashkëpunim me qeverinë gjermane, nisin zbatimin e një programi të ri, “AgriChallenge” që bashkon 100 studentë të bujqësisë, fermerë të rinj nga rajoni i Korçës, për të gjeneruar dhe zbatuar ide të reja në fushën e Startup-e.
Zv.ministri i Bujqësisë dhe Zhvillimit Rural, Enio Civici i pranishëm në promovimin e këtij programi që u zhvillua në Korçë, tha se, “ky është një konkurs inovator që bën bashkë 100 të rinj të apasionuar ndaj teknologjisë dhe bujqësisë, me pasionin për zbatimin e ideve të tyre në Startups”.

Sipas tij, përmes digjitalizimit të bujqësisë synohet të shkohet drejt çdo burimi informacioni që kemi në lidhje me bujqësinë, duke adresuar nevoja bazë që i shërbejnë gjithë komunitetit, konkurrueshmërisë dhe nxitjes së eksporteve.

Vitet e fundit fermerët kanë shtuar kërkesat për informacion në fushën e inovacionit dhe start-up pranë Qendrave të Transferimit të Teknologjisë Bujqësore. Kjo për faktin se, gjithnjë e më shumë po synohet që prodhimi bujqësor vendas të orientohet drejt eksporteve.

“Ndaj dhe programi i ri synon të nxisë startup-et në sektorin e bujqësisë, për rajonin e Korçës që spikat për potenciale të larta të prodhimit dhe eksportit bujqësor”, tha Civici.

Në këtë aktivitet u prezantuan disa shembuj konkret në fushën e Startup-ve në bujqësi.

Në fazë të parë projekti ka bërë një studim mbi nevojat e bujqësisë në rajonin e Korçës dhe parashikon që këtyre nevoja të rinjtë t’ju përgjigjen me zgjidhje inovative.

Përfaqësues të programit për Zhvillimin e Qëndrueshëm Rural u shprehën se, “Shqipëria duke përfshirë edhe Korçën, është pjesë e ndryshimeve të mëdha që po ndodhin në të gjitha nivelet përfshirë edhe atë ekologjik dhe kjo është arsyeja që Qeveria Gjermane po mbështet zhvillimin e qëndrueshëm rural”.

Ata ftuan të gjithë të rinjtë të bëhen pjesë e këtij projekti që nis zbatimin për herë të parë në qytetin e Korçës, për tu bërë shembull edhe në rajone të tjera të vendit.

/a.a/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.